Majalisar Matasan Arewa ta yaba da Majalisar Dokoki wajen amincewa da kudirin kafa ’Yan Sanda na Jihohi

Majalisar Matasan Arewa (NYA) ta yi maraba da matakin tarihi na Majalisar Dokoki ta kasa wajen amincewa da kudirin sauya kundin tsarin mulki da zai ba da damar kafa ’Yan Sanda na Jihohi a fadin Tarayyar Najeriya.

‘Yan Majalisa 289 ne suka amince da kudirin, yayin da wasu 4 kacal suka ki, ya nuna cewa akwai cikakken matsaya ta kasa kan gaggawar inganta tsaron Najeriya ta hanyar tsarin ’yan sanda na al’umma da ya dogara da jihohi. Wannan al’amari ya nuna fahimtar cewa kalubalen tsaro na zamani na bukatar sabbin hanyoyi da suka dace da yanayin kowane yanki.

Labari: Shari’ar Nadin Shugaban Jami’ar FUD Ta Dauki Wani Sabon Salo

A matsayinta na kungiya mai wakiltar miliyoyin matasan Arewa, muna da yakinin cewa kafa ’Yan Sanda na Jihohi na daya daga cikin manyan sauye-sauyen tsaro tun bayan dawowar Najeriya ga mulkin dimokuradiyya a 1999. Shekaru da dama, Al’ummar Arewa suna sha wahala daga matsalolin tsaro irin su ta’addanci, garkuwa da mutane, satar shanu, rikice-rikicen kabilanci, da sauran laifuka da suka shafi rayuwa, tattalin arziki, da zaman lafiya.

Tsarin ’yan sanda na kasa, duk da jajircewar jami’an ’Yan Sanda na Najeriya, ya kasa shawo kan girman kasa, yawan jama’a, da bambancin matsalolin tsaro. Kafa ’Yan Sanda na Jihohi zai ba da damar kara karfin tsaro ta hanyar kusantar da jami’an tsaro ga al’umma.

Amfanin ’Yan Sanda na Jihohi ga Arewa

– Ingantaccen tattara bayanan sirri: Jami’an tsaro daga cikin al’umma za su fi fahimtar harshe, al’adu, da yanayin yankin.
– Amsa kiran gaggawa: Za a rage jinkiri wajen daukar mataki kan matsalolin tsaro.
– Damar aikin yi: Dubban matasan Arewa za su samu aikin yi ta hanyar shiga aikin ’yan sanda na jihohi.
– Ingantaccen tsaro: Zai karfafa zuba jari, bunkasa noma, da farfado da tattalin arzikin karkara.

Karanta Labari: Kudin Marayu: Yan Sanda Sun Kama Ma’aikacin Kotu Saboda Zargin Wawure Naira Milyan 35

Misalan Duniya

Kasashe da dama masu dimokuradiyya sun dade suna amfani da tsarin ’yan sanda na jihohi:
– Amurka: Kowace jiha na da nata rundunar ’yan sanda.
– Kanada: Yankuna na da ’yan sanda na yankinsu.
– Ostiraliya: Kowace jiha na da nata ’yan sanda.
– Jamus: Jihohi na da ikon tsaro tare da hadin gwiwa da gwamnatin tarayya.

Wannan ya nuna cewa tsarin ’yan sanda na jihohi ba ya raunana hadin kan kasa, sai dai yana karfafa mulki, inganta alhakin shugabanci, da tabbatar da tsaro.

Kammalawa

Amincewar da aka yi da kudirin kafa ’Yan Sanda na Jihohi ba kawai nasarar dokoki ba ce, illa dai mataki ne mai muhimmanci wajen gina Najeriya mai tsaro da zaman lafiya. Ga Arewa, wannan na nufin sabuwar fata ta kariya ga al’umma, aikin yi ga matasa, ci gaban tattalin arziki, da dorewar zaman lafiya.

Majalisar Matasan Arewa na tsayawa kan goyon bayan wannan sauyi na tsaro tare da ci gaba da fafutukar manufofi da ke inganta zaman lafiya, tsaro, ci gaba, da hadin kan kasa.

Abdulhafiz Garba PhD
Sakataren Janar
Majalisar Matasan Arewa